سنة أولى في كلية الحاسب 💻✨

سلام عليكم 👋🏻. 

معكم أسماء الهاجري طالبة حاسب رايحة مستوى خامس 🌟. 

هذه راح تكون ثاني تدوينه لي وان شاء الله تستفيدون منها 💛.

بتكلم عن تجربتي في دراستي مستوى ثالث ورابع في كلية الحاسب وطبيعة المواد فيها .

بسم الله نبدأ👏.

🔸طبيعة الدراسة : 

الي جاي من التحضيري بتكون طبيعة الدراسه تختلف عن التحضيري يعني بالنسبة لي
بالتحضيري ماكنت الجأ لمصادر اخرى علشان افهم المواد لان كنت اكتفي
بشرح الدكاتره وافهم منهم، بس بالحاسب المواد ماتعتمد على انك تكتفين
على شرح الدكتور لازم تلجأين لمصادر ثانيه علشان تتأكدين انك فاهمه .

المصادر اقصد فيها يوتيوب وقوقل .... 

🔸مبنى الكلية :

رقم ٦٥٠ 

الدور الأرضي فيه كلاسات المرئيه و غرفة الاداريات 

الدور الأول فيه كلاسات وغرف اعضاء هيئة التدريس والكافتيريا . 

الدوام من ٨ الصباح الى ٥ مساء وانتي على حسب جدولك . 

🔸الترم الأول : 

بحطلكم جدولي الترم الأول :

🔸مواد الترم الأول :

‏◽️CIS 211:💡

مادة نظم معلومات الحاسوبية .

المادة كلها تتكلم عن البزنس وكيف هو يكون نظام الشركة وكيف يكون امن

وكل المواضيع تندرج تحت البزنس .

الماده مواضيعها ممتعه بس الكلام فيها كثييير . 

وأسئلة اختباراتها ليفل الصعوبه ادفانس وتعتمد على فهمك للماده .

الماده فيها كتاب بس صراحه الدراسه تعتمد كلها على السلايدات . 

فيها كويزين من ٨ درجات 

وميد تيرم من ٢٠ 

وفاينل ٤٠ 

ومشروع من ١٠ درجات 

المشروع كان بحث من مواضيع من نفس المادة

البحث لازم تهتمون بكل نقطه في التعليمات الي تعطيكم اياها المس

لان التصحيح حق هالقسم مرره دقيق .

‏▫️CS 211: 💻

اول مادة برمجه 👏🏻👏🏻. 

المادة بتاخذون فيها اساسيات البرمجة والتطبيق على برنامج DEV++ لغة البرمجة c++

هذا البرنامج الي بتشتغلون عليه .

, الماده ممتعه وخصوصا الي يحبون البرمجة .

طبعا فيها محاضره ولاب .

المحاضرة تشرح لكم الشي الي بتاخذونه وبتطبقونة  باللاب .

المادة كنت اذاكرها من السلايدات .

وتحتاج تطبيق كثير ، احيانا تكونين فاهمه الشرح بس لما يجي اللاب

ماتعرفين تطبقين او لما المس تعطيك تحلون تاسك تكونين فاهمه

بس ماتعرفين من وين تبدأين هذا يحتاج انك تطبقين على كل التاسكات الي باللاب .

بعطيكم رابط قناة باليوتيوب مره استفدت منه يشرح c++ كل شي اخذناه بتلقونه

بقناته اسمه محمد دسوقي هذا استاذ البرمجه بالكلية 😂. 

دسوقي فنان البرمجه

المادة فيها كويزين نظري من خمسه 

وثلاث كويزات لاب  من خمسه 

ميد تيرم نظري ( بس فيه اسأله اساي يعني كتابة كود وفيه اختياري ) من ٢٠ .

واسايمنت من ١٥ درجة بعض المسات يوزعون الاسايمنت الى اكثر
من واحد يعني كل اسبوع ياخذون واحد . 

بس احنا اخذناه مره وحده وكان ٧ تاسكات فيها السهل وفيها الصعب وتحلونها قروب .

فاينل من ٤٠ درجة طبعا نظري .

المادة هذي اخذي وقتك فيها في التطبيق وحاولي تفهمين التاسك

وفيه تفاصيل صغيرة مراح تفهمينها الا اذا طبقتي من نفسك .

وفي اللاب الكلية موفرة اجهزة بس عادة ماتكون تكفي البنات واحيانا تعلق ،

اريح لك استخدمي لابتوب حقك وعلشان انتي متعوده عليه
حتى بالاختبارات راح تشتغلين على لابتوبك .

‏

‏▫️MATH  211:

‏Calculus

 

التفاضل والتكامل 

المادة تشبه ماث الي بالتحضيري بس اصعب شوي .

انا كنت معتمده بالفهم على اليوتيوب بحطلكم قنوات استفدت منها في دراسة هالمادة .

pen and paper

قناة بين ان بيبر لخالد النجار فناان كالكولس ساعدني كثييير بهالمادة انصح تتابعونه .

قناة إبراهيم عكه

وهذا بعد انصح فيه .

JG

هذا نسميه ابو شاشه سوداء 😂، هذا بدون مبالغة شارح كل المواد العلميه فيزياء وماث حتى احياء 

كل شي تحصلونه في قناته اسطووره 👌.

فيها اربع كويزات نظري من خمسه.

وميد تيرم من ٢٠

وفاينل من ٤٠ 

فيها ثلاثه اسايمنت من ٥ درجات .

المادة تحتاج تطبييق على الاسئله كثثييير  علشان تضمنين الدرجة الكويسه .

‏

▫️PHYS 212:

فيزياء عليه اربعه كردت من المعدل .

الماده سهله بس تحتاج تذاكرين اول باول ومذاكرة من السلايدات ومافيها لاب. 

ثلاث كويزات نظريه من خمسه.

ميد تيرم من ٢٠ .

فيها ٢ اسايمنت من ٥ .

وبروجكت تسوون بحث من ١٠ 

وفاينل من ٤٠ .

▫️‏ISLM:

إسلاميه يكون في مبنى ثاني شوي بعيد عن مبنى كليتنا

بس عادة الكلية تخلي الدفعه كلهم بيوم واحد ياخذون اسلاميك

ويكون في الصباح بحيث انه اول ماتجون تنزلون عند مبنى الاسلاميه

وتحضرون محاضرتكم بعدها تروحون لكلية الحاسب .

اخذنا فيها كتابين ( العقيدة الإسلاميه ، الأسره في الإسلام )

الكتاب الاول اختبرنا فيه ميد تيرم من ١٥ بعدين بدأنا الكتاب الثاني واختبرناه مع الفاينل من ١٥ 

هذي الكتابين الي اخذناهم

الدراسة كان اسبوع اونلاين واسبوع نحضر بالكلية .

يعني ناخذ المحاضرة اونلاين مو مباشرة مسجلة يعني

عادي تحضرينها في اي وقت تبينه وعلى كل محاضرة اختبار قصير

من درجة يكون على البلاك بورد ولازم تحلينه خلال الاسبوع لانه يتقفل 

فيها انشطه ترفعينها على البلاك بورد عليها خمس او اربع درجات 

وفيها مشروع من ١٥ . 

وبكذا خلصنا من الترم الأول 👏🏻👏🏻. 

🔸الترم الثاني :  

في هذا الترم واجهنا تحديات كلنا بسبب جائحة كورونا

وراح اذكرلكم تجربتي مع المواد ممكن راح تختلف الاوضاع معكم .

واتمنى تعدي هالأزمة على خير واحنا واهلنا ووطنا في صحة وعافيه 😪♥️. 

هذا جدولي الترم الثاني 

🔸مواد الترم الثاني :  

‏▫️CS 221: 💻

مادة البرمجة راح تكملون على الي درستوه في الترم الأول

نفس البرنامج ونفس اللغه بس راح تاخذون تمارين مستواها أعلى .

تقريبا المادة نفس الي تكلمت عنها بالترم الاول .

بس توزيع الدرجات اختلف معنا بسبب كورونا 

يعني احنا اختبرنا بس لاب كويز واحد ومفروض اكثر من واحد .

واخذنا بدالها ثلاث كويزات ثيوري 

واحد من خمسه درجات قبل كورونا

وواحد من سبعه درجات

وواحد من ثمانيه درجات بعد كورونا 

وميدتيرم من ٢٠ 

وبروجكت من ١٥ . 

بالبروجكت اشتغلنا فيه انا والقروب حقي اونلاين وواجهنا صعوبات وتحديات

بس الحمدالله انها عدت وجبنا درجة كويسه وهذا شي يفرح 😭. 

‏▫️BIOL222:👩🏻‍⚕️

أحياء ✨. 

الماده بتدرسون فيها من الخليه وتركيبها الى اجزاء جسم الانسان واعضاءه ،

الماده كانت معلوماتها ممتعه ومفيده وماكانت صعبه بس تحتاج ووقت تترجمين

المصطلحات لان فيها مصطلحات طويلة وتحتاج حفظ واهم شي تلخيص

والخرائط الذهنيه بتساعدك بهالماده .

الماده سهلة جددا 🌟. 

بس عليها اربع كردت يعني تقدرون تضمنونها بسهوله 😜. 

وفيها لاب تاخذونه في مبنى الطب اللاب يكون اسبوع فيه واسبوع مافيه .

توزيع درجاتها فيها اختبارين ميد نظري من ٢٠ درجة 
واحد بنص الترم وواحد قبل الفاينل .

وكويزين نظرية اونلاين من ٢.٥ .

ولاب فاينل يكون نظري بعد من ١٢.٥ .

وفاينل من ٤٠ .

‏▫️STAT207:📊

إحصاء وما اداراك ما الإحصاء الي قروا مدونتي حقت التحضيري بيعروفن اني ابغض هالماده 😭💔💔. 

بالنهاية هذي تجربتي الشخصية تختلف من شخص الى شخص

ولاتحكمون على مادة من تجربة اي احد احكموا عليها من تجاربكم 👍🏻👍🏻. 

طيب إحصاء هالمره يختلف عن حق التحضيري مره مستواه اعلى يعني يحتاج جهد ووقت .

المذاكرة في كتاب تقدرون تشترونه وفيه سلايدات 

السلايدات شوي حوسه وخصوصا الاحصاء اغلبه رسومات . 

انا عن نفس كنت اذاكر سلايدز بس لو رجع الزمن بذاكر من الكتاب. 

فيه اربع كويزات نظرية من خمس درجات

ميدتيرم من ٢٠ درجة 

وفاينل من ٤٠

والمشروع من ١٥ 

المشروع😭😭😭. 

نصيحة مجرب ابدأو فيه من بدري لو تبدأون من بداية الترم بس احرصو

تبون بدري لان انا وقروبي نقصنا كثير على سالفة التأخير 😪. 

المشروع لازم تختارون موضوع احنا كان موضوعنا سواقة المرأه للسيارة بالسعوديه

ومامدى تأثيرها على المجتمع وعلى المرأه السعودية 

مابي اتعمق بس تحتاجون بالبداية تسوون proposal تحطون فيه اسمائكم

وعنوان الاحصائيه الي بتسوونها وباقي التفاصيل تاخذونها من النموذج الي تعطيكم اياه المس .

بعدها تسوون إستبيان تنشرونه للناس يعبونه بحطلكم رابط إستبيان مشروعنا يمكن يفيدكم.

رابط الأستبيان

اكرر يحتاج وقت ابدأو بدري 👆🏻. 

‏▫️CS222:🧲

‏Electronic 

مادة الكترونيات هي تتبع مادة الفيزياء الي بالترم الأول ،

بس المادة هذي بتاخذون فيها دوائر كهربائية والمقاومات ومتصله على التوالي وعلى التوازي .

فيها كتاب وسلايدز ودايم الدكاتره ينصحونا بالكتاب واننا لازم نرجعله . 

انا عن نفسي ذاكرته من السلايدز واحل اسئلة الكتاب واذا تبغين زيادة معلومات ذاكريه من الكتاب .

المادة فيها لاب في اللاب راح تطبقون شلون تسوون دائرة كهربائية على 

اللاب مره ممتع 👏🏻. 

توزيع الدرجات 

خمس كويزات لاب عليها خمس درجات

وكوزين نظريه من خمسه 

وميدتيرم نظري من ٢٠.

مادري اذا فيه مشروع ولا لا لان احنا ماعطونا مشروع  تعرفون بسبب كورونا
توزيع الدرجات اختلف وصار كل قسم يوزع من نفسه .

هذي breadboard الي بتشتغلون عليها في اللاب تسوون عليها دوائر كهربائيه

‏◽️ARAB: 📝 

مادة اللغة العربية كثييير استفدت منها وفي أغلاط إملائية كنت ما ألاحظها
بس الحين صرت أنتبه للتاء المربوطة والهمزات .

المادة تكون أسبوع اونلاين وأسبوع بالكلية .

كل أسبوع تاخذون اختبار قصير من اربع درجات اونلاين وبعض الأحيان انشطة من خمس درجات .

مفروض يكون لها فاينل بس احنا استبدوله بتكاليف مهارية تكليفين كل تكليف عليه ١٠ .

_________________________________________________________


في النهايه الحمدالله الذي قدرني أن أكتب هذه المدونة وأسأل الله أن يجعلها شفيعة لي لا علي
وأن تكون خير معين لما هم بعدي 💖.

أهديكم هذي السطور وتذكروها عندما تشعرون بالأحباط واليأس ✨

"عندما يومئ إليكم الفجر بخجل، سيروا إليه بإصرار
 وحين تهمس الحياة في آذانكم برقّة،
 أجيبوها بصوت يصل إلى مسمع الشواهق.
عندما يباغتكم اليأس، باغتوه بابتسامة الإيمان
وعندما تضجّ صدوركم بالأحلام الكبيرة،
 أقسموا أن تكونوا أكبر من أحلامكم
سوف ترتكبون العديد من الأخطاء،
 فلا تخجلوا من أخطائكم،
 وسوف يلتهم الفشل أمانيكم الغالية،
 فلا تنصرفوا من مطاردة الأماني إلى مطاردة الفشل."
                                         د.غازي القصيبي رحمه الله 

بحطلكم حسابي تويتر لاي استفسار او سؤال ❤
asmaxalhajri